Kryetari i PDK-së, Memli Krasniqi ka bërë të ditur se do t’i përgjigjet pozitivisht ftesës së kryeministrit në detyrë, Albin Kurti për takim nesër para fillimit të seancës konstituive.

Me anë të një postimi në Facebook, Krasniqi tha se Republika e Kosovës ka nevojë urgjente për zhbllokimin institucional dhe rikthimin e funksionimit të rregullt të institucionit më të lartë legjislativ, përcjell Arbresh.info.

Përveç kreut të PDK-së, Kurti i ka dërguar ftesë për takim edhe kryetarit të LDK-së, Lumir Abdixhiku mirëpo një takim i tillë nuk është pranuar pasi sipas LDK-së, kryetari Abdixhiku nuk ndodhet në Kosovë.

LEXO EDHE:

Pas gjashtë dështimesh Albin Kurti dorëzohet, thërret për konsultime Memli Krasniqin e Lumir Abdixhikun

Postimi i plotë i Krasniqit:

Sot kam pranuar një letër nga Kryetari i koalicionit Vetëvendosje-Guxo-Alternativa, z. Albin Kurti, me ftesë për një takim para vazhdimit të seancës konstituive të Kuvendit të Kosovës që mbahet nesër.

Duke besuar thellësisht se Republika e Kosovës ka nevojë urgjente për zhbllokim institucional dhe për rikthimin e funksionimit të rregullt të institucionit më të lartë legjislativ, si dhe për t’i hapur rrugë afateve kushtetuese për themelimin e Qeverisë, do t’i përgjigjem pozitivisht kësaj ftese për takim.

Në këtë frymë, e inkurajoj z. Kurti që të reflektojë me përgjegjësi mbi situatën aktuale dhe të shfaqë vullnet të sinqertë për të mundësuar formimin e institucioneve të reja, në mënyrë që Kosova të ketë sa më parë një Kuvend dhe një Qeveri legjitime e funksionale.

Në këtë kontekst, gjetja e një kandidateje apo kandidati të përshtatshëm, që gëzon mbështetjen e shumicës së deputetëve, do të ishte një hap i rëndësishëm përpara.

Natyrisht, për çështjen e nënkryetarëve të Kuvendit nuk ka asgjë për të diskutuar, pasi kjo është një e drejtë e garantuar nga Kushtetuta dhe e përcaktuar qartë.

Partia Demokratike e Kosovës, sikur gjithmonë, do të vazhdojë të sillet me përgjegjësi dhe seriozitet institucional, në përputhje me interesin shtetëror dhe qytetar.

Të gjitha qëndrimet e detajuara të PDK-së do t’i bëjmë publike edhe nesër, gjatë dhe pas takimit, përmes një konference për media./Arbresh.info

LEXO EDHE:

Pas gjashtë dështimesh Albin Kurti dorëzohet, thërret për konsultime Memli Krasniqin e Lumir Abdixhikun